उदयपुर सिमेन्ट उद्योग ३५ औँ वर्षमा

सरोज निरौला

उदयपुर । गैंडाछाप सिमेन्टको उत्पादक उदयपुर सिमेन्ट उद्योग लि. (उसिउलि) स्थापनाको ३४ वर्ष पुरा भएको छ । सोमबार ३४ वर्ष पार गर्ने उद्योगले सो अवसरमा ‘३४ औं साधारणभा’ र ‘३५ औं वार्षिकोत्सव’ छुट्टाछुट्टै कार्यक्रम गरी मनाउने तयारी गरेको छ ।

उद्योगले स्थापनाकाल २०४४ देखि ०७८ सम्मको १४ वटा साधारणसभा गतवर्ष एकैचोटी गरेको थियो । अव भने उद्योगले हरेक वर्ष साधारणसभा गर्ने योजना अनुसाार कार्यक्रम तय गरेको जनाएको छ । उसिउलिका सूचना अधिकारी लक्ष्मण पोखरेलका अनुसार ३४ औँ साधारणसभामा उद्योगको वार्षिक प्रतिबेदनमार्फत वासलात र वर्षभरीको व्यवसायिक नाफा नोक्सान बिबरण प्रस्तुत गरिनेछ ।

नियमित लेखा परीक्षण गराउन लेखा परीक्षक नियुक्तिसम्बन्धी प्रस्ताव, उद्योगको प्रबन्धपत्र र नियमावलीमा आवश्यक्ता अनुसार समसामयिक संशोधन गर्ने विषयका प्रस्तावहरु पनि साधारणसभामा प्रस्तुत गर्ने कार्यक्रम रहेको पोखरेलले बताए । उद्योग शेयर सदस्यमा उद्योग, बाणिज्य तथा आपूर्ति मन्त्रालय, कोष तथा महालेखा नियन्त्रण कार्यालय, उद्यो्ग विभाग र खानी विभाग रहेको उसिउलिले अन्य बिबिध विषयमा पनि साधारणसभामार्फत छलफल र निर्णय गर्ने जनाएको छ ।

सञ्चालक समिति अध्यक्षमा उद्योग मन्त्रालयकी सहसचिव चन्द्रकला पौडेल छिन् भने सदस्यमा उद्योग मन्त्रालयका उपसचिव विशाल सापकोटा, अर्थ मन्त्रालय अन्तर्गत आन्तरिक राजश्व कार्यालय लाहानका प्रमुख राजकुमार खतिवडा रहेका छन् । महाप्रबन्धक (जिएम) गोपीकृष्ण न्यौपाने सहसचिव रहने व्यवस्था छ ।

५ सञ्चालक सदस्य र २ विज्ञ सदस्य भने ३ वर्षे पदावधि सकेर विदाईको तयारीमा छन् । उनीहरुलाई साधारणसभाकै अवसरमा सम्मानसहित बिदाई गर्ने कार्यक्रम राखिएको छ । कार्यावधि पुरा भएका सदस्यहरु सम्झना पाख्रिन, पदम दाहाल, सुभाष राउत, महेशलाल यादव र कृष्णचन्द्र मण्डल तथा विज्ञ सदस्यद्वय देवीप्रसाद बराल र नरेश ढकाललाई सम्मान गर्दै बिदाई गर्ने पोखरेलले बताए ।

जेठ ३० गते साधारणसभा गर्ने उद्योगले ३१ गते ‘३५ औं वार्षिकोत्सव’ मनाउने भएको छ । सो अवसरमा उद्योगको कोईला गोदाममा नवनिर्मित ‘कोल मिल बेल्ट’को उदघाटन गरिनेछ छ । कच्चा पदार्थ कोईला राख्ने कोल यार्डबाट सोझै भट्टीसम्म कोईला लानका लागि कोल मिलमा बेल्ट जडान गरिएको जिएम न्यौपानेले बताए । उनका अनु्सार त्यसको उद्घाटन उद्योग मन्त्रालयका सचिव अर्जुन पोखरेलले गर्ने कार्यक्रम छ ।

पहिले टिफर, ट्याक्टर र ट्रलिबाट बोकेर मुख्य भट्टीसम्म लानुपर्ने समस्या बेल्ट जडान भएपछि अन्त्य भएको छ । मेकानिकल विभाग प्रमुख टीका कुँवर नेतृत्वको प्राविधिक टोलीले १५ लाख रुपैंयामा यो बेल्टर जडान गरेको हो । कोल मिल बेल्ट निर्माण भएसँगै वर्षेनी ३५ लाख रुपैंया उद्योगको बचत हुने कुँवरले बताए ।

उद्योगले नवनिर्वाचित त्रियुगाका नगरप्रमुख, उपप्रमखु र उद्योग परिसरसँग जोडिएका वडाध्यक्षलागयत जनप्रतिनिधिहरुलाई बधाई तथा अभिनन्दन पनि गर्ने जनाएको छ । वार्षिकोत्सवको अवसरमा उद्योगमा बिभिन्न जातका १ हजार विरुवा रोप्ने कार्यक्रम जिएम न्यौपानेले बताए ।

प्रकाशित मिति: २०२२-०७-१४ , समय : ०८:१४:०८ , २ वर्ष अगाडि